fbpx

Id-direttiva li passiġġieri fuq il-Gozo Channel jibqgħu fil-karozza għandha tkun irtirata

 Il-UĦM Voice of the Workers qed titlob biex id-direttiva li matul il-jiem tal-Karnival il-passiġġieri abbord il-vapuri tal-Gozo Channel “ikunu mħeġġa” jibqgħu fil-karozzi matul il-vjaġġ tkun irtirata immedjatament. Dan minħabba l-fatt li prattika bħal din tmur kontra konvenzjonijiet marittimi internazzjonali dwar is-sigurtà kif ukoll il-protokolli tal-Gozo Channel innifisha. Id-direttiva kienet tħabbret mill-Prim Ministru Robert Abela f’konferenza tal-aħbarijiet nhar is-27 ta’ Jannar li għadda u se tkun fis-seħħ bejn nhar il-Ħamis 11 ta’ Frar u l-Erbgħa 17 ta’ Frar.

Il-UĦM li tirrapreżenta l-ħaddiema tal-Gozo Channel, kien ġibdet l-attenzjoni tal-kumpanija dwar dan il-periklu immedjatament. Barra minn hekk kienet insistiet biex isir risk assessment indipendenti, dwar il-prattika li passiġġieri jibqgħu fil-karozza matul il-vjaġġ. Fin-nuqqas ta’ dan, il-kaptani tal-Gozo Channel mhux se jerfgħu responsabbiltà ta’ xi konsegwenzi li jista’ jkun hemm b’din id-direttiva. Il-UĦM tixtieq tesprimi wkoll it-tħassib tagħha għall-fatt li qed tinħoloq konfużjoni abbord, b’xi passiġġieri jirrifjutaw li joħorġu mill-karozza fost rimarki bħal “tgħid mhux ser nisma’ minnek u ninjora l-Prim Ministru”. Kummenti bħal dawn qed ikunu indirizzati lejn il-ħaddiema u l-uffiċjali tal-Gozo Channel.

Għaldaqstant il-UĦM se tibqa’ tinsisti biex jinħareġ avviż mill-awtoritajiet konċernati biex tkun irtirata din id-direttiva u fl-istess ħin tkun iċċarata s-sitwazzjoni fl-interess tas-sigurtà ta’ dawk kollha li jaqsmu l-fliegu. Lil hinn minn din il-kwistjoni il-UĦM issostni li jkun żball jekk l-awtoritajiet jaħsbu li billi tikkontrolla l-moviment tal-passiġġieri matul in-nofs siegħa tal-vjaġġ biss se tkun qed twaqqaf mit-tixrid tal-pandemija. L-esperjenza ta’ żmien il-festi meta l-każi attivi splodew għax kien hemm min għalaq għajnejh għar-restrizzjonijiet tal-COVID-19, uriet li biex is-sitwazzjoni tibqa’ taħt kontroll għandu jkun hemm strateġija wiesgħa li tħares lejn l-aspetti kollha ta’ kif din il-pandemija tista’ tinxtered u mhux biss miżuri kożmetiċi.

Like this article?

Share on facebook
Share on Facebook
Share on twitter
Share on Twitter
Share on linkedin
Share on Linkdin
Share on pinterest
Share on Pinterest

Leave a comment